2024 йил 26 август куни Олий Мажлис Қонунчилик палатасидаги Ўзбекис­тон Экологик партияси фракциясининг навбатдаги йиғилишида бир қатор қонун лойиҳалари биринчи ва иккинчи ўқишда кўриб чиқилди. Йиғилишда дастлаб «Ер қаъри тўғрисида»ги қонун лойиҳаси иккинчи ўқишда атрофлича муҳокама қилинди.
 

Мазкур қонун лойи­ҳаси ер қаърини геологик ўрганиш, ундан самарали ва масъуллик билан фойдаланиш ва қайта тўлдириш, уни замонавий амалиёт билан уйғунликда муҳофаза қилиш ҳамда тизимли назоратини таъминлашга қаратилган.
Йиғилишда таъкидланганидек, қонун лойиҳа­си билан ер қаъридан фойдаланиш ҳуқуқи учун рухсатномалар бериш, ҳисоботларни қабул қилиш ва бошқа соҳадаги давлат хизматларини кўрсатиш жараёнларида «ягона дарча» принципи жорий этилмоқда. Шунингдек, норуда хомашё конларини қидириб топиш ва ўзлаштиришга оид нормалар кучайтирилмоқда.
– Янги нормалар Ўзбекистон Экологик партия­си мақсадлари ва электорати манфаатларига мос. Қонун лойиҳасининг қабул қилиниши ер ости бойликларини масъулият билан геологик жиҳатдан ўрганиш ва улардан фойдаланиш, замонавий ишлаб чиқариш қувватларини ишга солиш, барқарор янги иш ўринларини яратишга хизмат қилади, – дейди Қонунчилик палатаси депутати, фракция аъзоси Носиржон Аминов.
Қизғин муҳокамалардан сўнг қонун лойи­ҳаси фракция аъзо­лари томонидан қўллаб-қувватланди. Йиғилишда кун тартибидаги масалалар кўриб чиқилиб, фракция­нинг тегишли қарори қабул қилинди.