Мана саноқли кунлар ўтиб, энг улуғ ва энг азиз байрам – мамлакатимиз мус­тақиллигининг 33 йиллик шодиёнасини катта тантана билан нишонлаймиз. Фарғона вилоятининг ҳудудлари бўйлаб байрам шукуҳи кезиб юрибди.

Сана муносабати билан маънавий-маърифий кечалар, йўқлов тадбирлари ўтказилмоқда. Марғилон шаҳрида ҳам ана шундай хайрли ташаб­буслардан бири илгари сурилди.
Янги ўқув йили, билимлар куни олдидан кам таъминланган, эҳтиёжманд оилаларнинг фарзандларига мактаб формалари топширилди. Болажонларнинг кўнглини кўтариш, уларга байрам кайфиятини улашиш мақсадида ҳокимлик вакиллари, Ўзбекистон ногиронлар ассоциацияси шаҳар бўлими ходимлари, «Инсон» ижтимоий хизматлар маркази ҳамда ЎЭП Марғилон шаҳар кенгаши масъуллари хайрли ишга бош бўлди.
Албатта, юртимизда кам таъминланган аҳоли қатламини қўллаб-қувватлаш, уларнинг турмуш тарзини яхшилаш йўлида катта ишлар амалга ошириляпти. Фуқароларни қийнаб келаётган муаммолар ва уларнинг ечими бугун бутун жамоатчиликнинг эътибор марказида. Марғилон шаҳар ҳокими бош­чилигида кам таъминланган оилаларнинг 25 нафар ўғил-қизига топширилган мактаб формалари ҳам ана шундай эътиборнинг бир нишонаси. Тадбир якунида ушбу жараёнга бевосита гувоҳ бўлган, фарзандининг кўзидаги қувончни кўриб ўзи ҳам севинган ота-оналар хайрли ташаббус бошида турган ташкилотчилар ҳамда саховатпеша ҳомийларга ўзларининг самимий миннатдорликларини изҳор қилдилар.
Гулрухсор ОМОНДИНОВА,
ЎЭП Фарғона вилоят партия ташкилоти бош мутахассиси