Одамларни рози қилиш, уларни қийнаб келаётган муаммоларни ҳал этиш инсонийликнинг энг олий саодатидир. Эътиборли жиҳати шундаки, республика, вилоят ҳамда шаҳар ва туманлар мутасаддиларининг уйма-уй юриш орқали аҳолининг дард-ташвишларини ўрганиб, уларнинг орзулари рўёбига қанот бағишлаётгани барчани бирдек қувонтиряпти.

Натижада ўз ишига, касбига ва даромадига эга бўлаётган аҳолининг эҳтиёжманд қатлами ўзларини оила ва жамиятда тўлақонли инсон сифатида ҳис қилмоқда.

Обод хонадон, обод кўча, обод маҳалла мезонлари амалга оширилаётган Қизилтепа туманидаги «Сўфиён» маҳалласида Ўзбекистон Экологик партиясидан сайланган Қизилтепа туман Кенгаши депутати Зуҳра Рашидова фуқаролар билан учрашди.

Учрашувда мурожаат қилган 10 нафар фуқародан 4 нафарининг муаммолари жойида ижобий ҳал қилиниб, 6 нафарининг муаммолари юзасидан тегиш­ли корхона ва ташкилотларга мурожаат йўлланди. Шунингдек, «Оқила аёллар ҳаракати» аъзолари ва маҳалладаги фаол хотин-қизларга маҳаллада олиб борилаётган ободонлаштириш ишларида фаол иштирок этиш ва хонадон гигиенаси, хонадонда тозалик-ободонлик бўйича тарғибот ишлари олиб борилиши юзасидан суҳбатлашилди.

Мамлакатимизда экологик барқарорликни таъминлаш, муаммоларни бартараф қилиш ва салбий оқибатларининг олдини олиш борасида жамиятнинг турли қатламларига мансуб фуқароларнинг фаол қатнашиши талаб этилади.

Депутат Зуҳра Рашидова билан биргаликда тумандаги 12-оилавий поликлиникада ўтказилган давра суҳбатида эса сув ресурсларининг камайиб бориши ва ифлосланиши, атмосфера ҳавосининг ифлосланиши, биологик хилма-хилликнинг қисқариши жараёнларини тўхтатиш, шунингдек, иқлим ўзгаришига мослашиш бўйича чора-тадбирлар кўриш масалалари ҳақида маълумотлар берилди.

Бир сўз билан айтганда, эҳтиёжманд оилаларни қўллаб-қувватлаш сиёсати мамлакатимиз бўйлаб бутун бўй-бастини кўрсатаётгани юртдошларимиз қалбида шукроналик туйғуларини мустаҳкамлаётгани айни ҳақиқат.

ЎЭП Навоий вилоят кенгаши

матбуот хизмати