Инсоннинг бахтли яшаши ўз қўлида, қилаётган меҳнатида. Суратдаги мана шу хонадонда бахтли одамлар яшаётгани остонасидан яққол сезилиб турибди.

Бор имкониятдан унумли фойдаланиб, мўъжазгина ҳовлисини яшнатиб қўйган бу хонадон соҳибларига сиз ҳам ҳавас билан қараётган бўлсангиз керак ҳойнаҳой.

Бу — Жиззах вилояти Шароф Рашидов тумани Туёқли маҳалласидаги Абдумўмин Каримов хонадони. Уйнинг томорқаси 12 сотих, шундан 7 сотихида иссиқхона барпо этилган. Бундан ташқари, чорва, товуқ, асалари боқилади. Хонадон эгаси рўзғорбоп экинлар етиштириб, йилига 200 миллион сўмдан зиёд даромад олаётган экан.

Ҳа, излаган имкон топар, дея бежиз айтмайди халқимиз.

Куни кеча давлатимиз раҳбари Жиззах вилоятига ташрифи чоғида ушбу хонадонда бўлди.

– Ўртача маҳалладаги шу оддий хонадон мисолида кўраяпмизки, оиланинг ўзида ҳаракат бўлса, яхши даромад топса бўлади. Аҳоли ихтиёрида томорқалар, ундан фойдаланаман деган инсонлар ҳам кўп. Фақат уларга ёрдам бериш керак. Масалан, маҳаллий корхоналарни жалб этиб, иссиқхона қурилмалари, воиш, асалари уяси, кўчат, уруғлик ва озуқаларни яхлит тўплам қилиб, арзон нархда етказиб бериш зарур, – деди Шавкат Мирзиёев.