Янгиланиш ва яшариш, меҳр-мурувват ва эзгулик айёми – Наврўз юртимизнинг барча ҳудудларида кўтаринкилик билан кенг нишонланди. Истироҳат боғларида, дала-ю қирларда сайллар ташкил этилди, баҳорий таомлар тайёрланиб, ёши улуғ кексалар ҳолидан хабар олинди.

Давлатимиз раҳбари Наврўз умумхалқ байрамига бағиш­ланган тантанали маросимдаги нутқида халқимизни шарқона янги йил билан самимий муборакбод этиш билан бир қаторда, «Янги ҳаёт учун, Янги Ўзбекистон учун!» деган эзгу ғоя атрофида бирлашган олижаноб халқимизнинг меҳнати билан мамлакатимизда барпо этилаётган объектлар, амалга оширилаётган ислоҳотларга тўхталиб ўтди. Шу билан бирга, Ёшлар ва бизнесни қўллаб-қувватлаш йилида эътибор қаратилиши лозим бўлган устувор вазифалар ҳам алоҳида қайд этилди.

Юртбошимиз атроф-муҳит, экология масалаларига тўхталиб, «Наврўзи олам бизни бутун борлиқни, авваламбор, ер ва сув, ҳайвонот ва ўсимлик дунёсини, соф ҳавони асраб-авайлаб, она табиатга меҳрибон фарзанд бўлиб яшашга даъват этади. Ана шундай эзгу чорловга жавобан бугунги кунда юртимизда улкан ишлар амалга оширилмоқда, Наврўз ҳашарлари ўтказилмоқда. Жумладан, «Яшил макон» лойиҳаси доирасида миллионлаб мевали ва манзарали кўчатлар экилмоқда, янги боғу роғлар барпо этилмоқда», – дея урғу берди.

Шу ўринда Президентимиз анъаналарга содиқ қолган ҳолда шахсий намуна сифатида кенг жамоатчилик вакиллари билан биргаликда Тошкент шаҳрининг Сергели туманида ташкил этилаётган «Ёшлар боғи»да дарахт экиш тадбирида иштирок этганини алоҳида қайд этиш лозим.

Зеро, бугунги глобал иқлим ўзгаришлари шароитида азалий анъаналаримиз ва қадриятларимиз асосида яшилликни кўпайтириш, дарахт ва бута кўчатларини экиш орқалигина мусаффо табиатни келажак авлодга етказишимиз мумкин. «Ўзбекистон – 2030» стратегиясида ҳам «Яшил макон» умуммиллий лойиҳаси доирасида камида 200 миллион туп манзарали ва мевали дарахт ҳамда буталар кўчатларини, қаламчаларини экиш ва республикада 444 та яшил боғлар барпо этиш белгиланган.

Кўкка бўй чўзиб турган салобатли дов-дарахтлар, кўкаламзор жойлар кўзни яшнатиши баробарида ҳаво мусаффолигини ҳам таъминлайди. Табиий дренаж ҳисобланган кўп йиллик дарахтларнинг экилиши ҳудуддаги микроиқлимни юмшатади. Кўкаламзорлаштирилган ҳудудларни, айниқса, шаҳар ва автомобиль йўллари четида яшил ҳудудларни кенгайтириш атмосферага ташланаётган ифлослантирувчи моддалар миқдорини камайтиради. Борлиқнинг яшилликка бурканиши аҳоли саломатлигини сақлашнинг асосий омилларидан биридир.

Шундай экан, миллий қадриятларимиз ва анъаналаримизга содиқлик тимсоли сифатида мамлакатимиз ҳудудини боғу-бўстонга айлантиришга йўналтирилган «Яшил макон» умуммиллий лойиҳаси доирасида дарахт экиш тадбирларида фаол иштирок этишимиз мақсадга мувофиқ. Шу орқали Янги Ўзбекистоннинг «яшил» тараққиёти учун ҳисса қўшган, муқаддас бурчимизни бажарган бўламиз.

Хайрулло ҒАФФОРОВ,

Олий Мажлис Қонунчилик палатаси

Спикери ўринбосари, Ўзбекистон

Экологик партияси фракцияси раҳбари