Дунёда рўй бераётган экологик вазият бугун ҳеч кимни бефарқ қолдираётгани йўқ. Барча давлатлар бу жиддий масалага ўз имкониятлари доирасида муайян чоралар кўришга ҳаракат қилишяпти. Ўзбекистон эса, бу борада йирик ташаббуслар ва лойиҳалар билан жаҳон ҳамжамиятига ўз сўзини баралла айтаётгани ҳаммамиз учун шарафдир.

Мана, 2023 йил ҳам ортда қолмоқда. Якунига етаётган йилни сарҳисоб қилсак, юртимизда экологик барқарорликни таъминлаш юзасидан қилинаётган улкан ишлар бугун дунё аҳли томонидан эътироф этилмоқда. Ўзбекистон сўнгги йиллар ичида ўзининг бир нечта амалий лойиҳалари билан Марказий Осиё ҳамда дунё экологик харитасида жиддий ижобий ўзгаришлар қилаётгани самимий тан олиняпти.

2023 йилда БМТ Иқлим ўзгариши бўйича конференциясида (СOP28) иқлим ўзгаришининг салбий оқибатлари Орол фожиаси туфайли Марказий Осиёда айниқса жиддий сезилаётгани, минтақамизда ҳаво ҳароратининг ошиши жаҳондаги ўртача кўрсаткичдан икки баравар кўплиги, фавқулодда иссиқ кунлар сони икки марта ортиб, музликлар майдонининг учдан бир қисми йўқолиб бораётгани таъкидланди. Тупроқ емирилиши жараёнлари аҳоли турмуш тарзига салбий таъсир кўрсатаётган, кучли чанг ва қум бўронлари одатий ҳолга айланаёзган, ичимлик сув  тақчиллиги, ҳаво ифлосланиши, биохилма-хиллик йўқолиши, қишлоқ хўжалиги ҳосилдорлиги пасайиши каби муаммолар тобора авж олаётган нозик бир даврда Ўзбекистон ўзининг муҳим ва стратегик фаолиятида йирик ташаббусларни илгари сурмоқда, амалга оширмоқда. Якунланаётган йил давомида ҳам худди шундай ташаббус ва лойиҳалардан бир нечтаси муваффақиятли бажарилди.

Жумладан, юртимизда муқобил энергия улуши икки бараварга кўпайди. Ҳозирда «яшил» водород ишлаб чиқариш бўйича илк амалий қадамлар ташлангани келажакда энергия танқислиги масаласи етарлича ижобий ҳал этилишидан далолат бермоқда.

Анъанага айланиб бораётган «Яшил макон» ташаббуси доирасида мамлакатимизда 1 миллиард туп кўчат экилаётгани экологик лойиҳалар амалиётда изчил бажарилаётганини кўрсатмоқда.

Энг қувонарлиси, бунинг натижасида Орол денгизининг қуриган тубида 2 миллион гектар майдонда ўрмонлар барпо этилди.

Биологик хилма-хилликни асраш, табиий ресурслардан оқилона ва тежаб фойдаланиш, иқлим ўзгаришларига мослашиш, яшил технологияларни кенг жалб қилиш, чиқиндини қайта ишлаш саноатини такомиллаштириш каби бир қатор муҳим ва долзарб вазифалар кириб келаётган 2024 йилда ҳам Ўзбекистон Экологик партиясининг асосий мақсадига айланади.

«Биз – Яшил тараққиёт учун!» шиори остида мамлакатда экологик барқарорликни таъминлаш ҳамда табиий ресурслардан самарали ва оқилона фойдаланиш, халқимизнинг қулай атроф-муҳитга бўлган ҳуқуқларини рўёбга чиқариш ва келажак авлод учун муносиб турмуш шароитларини яратиш йўлида 2024 йилда ҳам бир зум тўхтамаймиз. Бу йўлда фидокор халқимизнинг қўллаб-қувватловига таянамиз.

Ўзбекистон Экологик партияси кириб келаётган 2024 йил якунига етаётган йилдан-да сарамали бўлишини барча ватандошларимизга самимий тилайди. Осмонимиз мусаффолигини таъминлаш, она табиатни асраш йўлида бирлашишга даъват қилади.

Кириб келаётган 2024 йил муборак бўлсин!

Ўзбекистон Экологик партияси