Олтин куз ҳам жадаллаб ўтиб борар экан, гўё табиат чуқур уйқуга чўмгандек, одамларнинг эса у билан боғлиқ юмушлари ҳам танаффус қилгандек таассурот уйғонади. Аслида табиат ҳеч қачон мудрамайди, у ҳамиша бедор ва уйғоқ. Шу боис инсоният ҳам табиатни асраш борасидаги ўзининг хайрли ишларида бир нафас бўлсин танаффус қилмасдан давом этиши зарур.

Ўзбекистон Экологик партияси Боғот туман кенгаши Экоҳаракатнинг Хоразм вилоят ҳудудий бўлинмаси, партиянинг «Ёшлар қаноти», Республика Маънавият ва маърифат маркази Боғот тумани бўлинмаси ва «Хоразм сув таъминот» МЧЖ Боғот тумани бўлими ҳамкорлигида халқаро табиий офатлар хавфини камайтириш кунига бағишлаб ўтказилган тадбирда ана шунга аҳамият қаратилди.

«Табиат ва ёшлар» мавзусида бўлиб ўтган давра суҳбатида атроф муҳит ва табиатни асраш борасида куз ва қиш фаслларида қилиниши лозим бўлган ишлар хусусида батафсил маълумотлар берилди.

 Жумладан, хазонларни ёқмаслик, ёввойи қушлар ва ҳайвонларга меҳрибонлик билан муносабатда бўлиш, теварак-атроф озодалиги борасида сўз юритилди.

Тадбирда сўзга чиққан мутахассис ва экологлар кузги кўчат экишнинг аҳамияти ҳақида қизиқарли маълумотлар билан ўртоқлашди. Табиат ер, сув, ҳаво, ўсимлик ва ҳайвонот дунёсидан иборат экани ва уларни асраб авайлаш ҳар бир фуқаронинг муқаддас бурчи экани ҳақида ҳам тушунтиришлар берилди.

Давра суҳбати якунида берилган саволларга атрофлича жавоблар қайтарилди ҳамда фаол иштирокчиларга партия томонидан эсдалик совғалари топширилди.

Улуғбек ИБРОҲИМОВ,

ЎЭП Боғот туман кенгаши раиси,

Халқ депутатлари туман

Кенгаши депутати