Сунъий йўлдош маълумотлари шуни кўрсатадики, сўнгги 20 йил ичида дунё океанининг 56 фоизи туси кўкдан яшилга ўзгарган. Бу ўзгаришлар, айниқса, экватор яқинидаги тропик минтақаларда яққол сезилади, деб хабар берди Euronews.

NASA агентлигининг Мodis-Aqua сунъий йўлдоши дунё океанининг ярмидан кўпи кўк рангдан асосан яшил рангга босқичма-босқич ўтганини қайд этган. Рангини ўзгартирган майдон Ердаги барча қуруқлик майдонидан каттароқдир.

Буюк Британиядаги Миллий океанография маркази таҳлилига кўра, яшил ранг глобал исиш туфайли экотизимларнинг ўзгариши белгиси бўлиши мумкин. Бу ўзгаришлар нима экани ва уларнинг аниқ сабаблари ҳали аниқланмаган.

Аммо, улар, эҳтимол, кўпчилик озиқ-овқат занжирлари асосидаги мавжудот­лар – фитопланктон билан боғлиқ. Бу организмлар биз нафас олаётган кислороднинг кўп қисмини ишлаб чиқаришда ва атмосферамизни барқарорлаштиришда ҳам муҳим роль ўйнайди.

«Иқлим ўзгаришининг оқибатлари денгиз микроорганизмлари экотизимида аллақачон сезилмоқда», дейилади тадқиқотда.

Тадқиқот муаллифларининг фикрича, океан рангининг ўзгариши экотизим ҳолатидаги ўзгаришларни акс эттириши мумкин. Тўқ кўк ранглар ҳаёт даражасининг пасайишини, яшил ранглар эса фитопланктон фаоллигини кўрсатади.

Олимларнинг фикрига кўра, океан рангидаги ўзгаришлар тенденциясини пайқаш учун 40 йилгача вақт керак бўлади.

Океан ранги ўзгаришини чуқурроқ ўрганиш учун 2024 йил январь ойида NASA агентлиги Pase космик аппаратини учиришни режалаштирган. У планктон, аэрозоллар, булутлар ва океан экотизимини кузатади.