Бухоро вилояти Олот туманида 100 ёшдан ошган дарахт ва буталарни аниқлаш ҳамда давлат муҳофазасига олиш борасида тадбирлар амалга оширилмоқда.

Жумладан, Олот тумани Жайхунобод маҳалласи Ёрматовлар хонадонида 109 ёшдан ошган тут дарахти борлиги аниқланиб, туман ҳокимининг қарорига асосан рўйхатга олинган эди.

– Оиламизда ушбу тут дарахти авлодлар оша ёдгорлик бўлиб келмоқда, – дейди Холмурод ота Ёрматов. – Бобом ушбу тутни 1914 йилда эккан эканлар. Ҳозирга қадар 4 авлод алмашди, ҳаммамизга ёдгорлик бўлиб келмоқда. Ҳозир ҳам мевасининг мазаси чакки эмас, парваришлаб, уни янада узоқ умр кўришини таъминлаш чораларини кўряпмиз.

Ўрганишлар жараёнида соҳа мутахассислари ҳамда Ўзбекистон Экологик партияси Бухоро вилоят кенгаши томонидан ушбу дарахтни алоҳида муҳофазага олиш борасида тарғибот ва маҳаллий аҳоли ўртасида уларни асраб-авайлаш кераклиги тўғрисида тушунтиришлар олиб борилди.

Жаҳонгир ШАРИПОВ,

ЎЭП Бухоро вилоят кенгаши раиси