Ўзбекистон Экологик партияси Тошкент вилояти Кенгаши ва Оҳангарон туман партия ташкилоти Кенгаши раислари Тошкент вилояти Оҳангарон тумани ҳудудида жойлашган чиқинди полигонида юзага келган ҳолатни ўрганишди.

Чиқинди полигонининг  умумий ер майдони 59 гектарни ташкил этади. Шундан чиқинди ташлаш учун мўлжалланган 40 гектардан 35 гектари тупроқ қопламаси билан ёпилиб, рекультивация қилинган.

Ҳозирги кунда 5 гектарига чиқинди ташлаб келинмоқда. Афсуски, шу 5 гектар майдонидаги чиқиндилардан ҳосил бўлаётган газ чиқиндиларнинг ёниб кетиши ва атмосфера ҳавосини ифлосланишига сабаб бўлмоқда.

Ушбу ҳолатни ўрганиш жараёнида аниқландики, «SIJIN» Корея компанияси билан 2018–2023 йилларга мўлжалланган меморандум имзоланиб, давлат дастурига киритилган эди. Аммо ҳозирги кунгача ҳеч қандай ўзгариш бўлмаган.

Мавжуд вазият чиқиндиларни утилизация қилиш ва қайта ишлашга ажратиш ишлари янада самарали ташкил этилиши зарурлигини кўрсатади. Бундай ҳолат масъуллар эътиборида бўлиб, тегишли амалий чоралар ишга туширилмас экан, чиқиндиларнинг атроф муҳитга зарарли таъсиридан сақланиш янада мураккаблашиши мумкин.