Қайд этиш жоиз, дунё миқёсида Грета Тунберг ва бошқа машҳур экофаоллардан руҳланиб, экологик стандартларни тобора жиддий ёқлаб чиқаётган ёшлар кўпайиб бормоқда. Мисол учун ифлосланган ҳаво ҳар йили 600 мингдан зиёд боланинг ҳаётига зомин бўлмоқда, юз миллионлаб бола хавфсиз ичимлик сув ва тўйиб овқатланиш имкониятидан баҳраманд бўла олмаяпти.

Афсуски, дунё миқёсида бундай аянчли рақамлар ўсиб боряпти. Бундай ҳолатларга жамоатчилик эътиборини қаратиш, одамларни уйғоқликка чорлаш муаммолар ечими учун дастлабки қадам бўлса, ажаб эмас. Шунинг учун ҳам экологик муаммолар ва уларни бартараф қилиш чоралари ҳақида ёшларга, болаларга кўпроқ маълумот бериш, ахборотни таъсирли етказиш услуб­ларидан фойдаланиш давр талаби десак адашмаймиз.

Шу кунларда ижтимоий тармоқларда «Нурафшон» телеканали орқали эфирга узатилган кўрсатувдан олинган экологик муаммоларнинг салбий  оқибатларини ўзида акс эттирган монолог юртдошларимизнинг қизғин муҳокамасига сабаб бўлди. Монолог кўплаб юртдошларимизни, мутасаддиларни экология ҳақида ўйлашга чорлаб, атроф муҳитни асраш нечоғлик муҳим эканига эътиборини қаратди, дейиш мумкин.

Куни кеча Ўзбекистон Экологик партияси Марказий Кенгаши Ижроия қўмитасида ушбу монолог муаллифи Дилшода Рустамжонова меҳмон бўлди. Партия раҳбари Абдушукур Ҳамзаев учрашувда Дилшода Рус­тамжонова сингари ёшларимизнинг фаоллиги бугунги кунда жуда муҳим эканини таъкидлаб ўтди ва унга экологик муаммоларга жамоатчилик эътиборини қаратгани учун алоҳида миннатдорлик билдирди. Шунинг­дек, Дилшода Рустамжоновага партиянинг ташаккурномаси ҳамда эсдалик совғалари топширилди.

Экологик муаммоларни куюнчаклик билан дадил кўтариб чиқадиган ва бошқаларни ҳам бунга даъват эта оладиган ҳамюртларимизнинг борлиги, бундай ёшлар сафи кенгаяётгани жуда қувонарлидир. Ўзбекистон Экологик партияси бу каби ёшларнинг она табиатимизни асраб-авайлаш йўлидаги фаоллигини ҳамиша қўллаб-қувватлайди.