Соғлом ва бахтли ҳаёт кечириш инсон учун берилган энг улуғ неъматлардан ҳисобланади.

Бироқ, гўдаклик чоғидан тузалмас дардга учраган ва навқирон ёшлик даврини касалхонада ўтказишга мажбур бўлган болалар кўзларидаги маъюсликни кўриш ҳар қандай инсонни изтиробга солади.

Ана шундай бемор болаларга касалликнинг сўнгги босқичида паллиатив ёрдам кўрсатиш, мурғак қалбли хаста болалар сўнгги нафасларигача меҳр, эътибор, парвариш, руҳий мадад қуршовида бўлиш мақсадида Президентимиз қарорига биноан Соғлиқни сақлаш вазирлиги ҳамда Адлия вазирлиги ёрдамида Зангиота ихтисос­лаштирилган юқумли касалликлар шифохонаси негизида юртимиздаги биринчи болалар «Таскин» хосписи очилган эди.

Умрларининг сўнгги кунларини кечираётган мана шундай болаларни бироз бўлса-да бахтиёр қилиш, уларнинг кўнгилларига малҳам бериш мақсадида Олий Мажлис Қонунчилик палатаси депутатлари Носиржон Аминов, Ольга Литвинова, Муқаддас Тиркашева, Дилбар Усманова, Равшан Бегматов ва Ўзбекистон Экологик партияси Тошкент шаҳар Кенгаши раиси Севара Файзиева ҳамда Миробод тумани Кенгаши раиси Дилдора Мавляновалар «Таскин» хосписида бўлишди. Болалар билан дилдан суҳбат қуриб, уларга руҳан мадад беришди.

Асосий мақсад – онкологик касалликларга чалинган ва оғир дард билан курашаётган болаларни бироз бўлса-да бахтиёр қилиш, уларга ҳамдард бўлиш, мурғак қалблардаги орзу-
умидларни эшитиш эди. Ўзбекистон Экологик партияси фаоллари болажонлар билан мароқли суҳбат қуришди. Уларга руҳан далда беришга, кўнгилларидаги орзу-ҳавасларини тинглашга, мурғак қалбларга таскин беришга ҳаракат қилишди. Болажонларга ширинликлар ва эсдалик совғалари тақдим этишди.

ЎЭП Тошкент шаҳар

партияташкилоти

Матбуот хизмати