Бугунги кунда аҳоли ўртасида экологик манадиятни ошириш, бу борадаги кўникмаларни ёшларга болалигидан ўргатиб боришга жиддий эътибор қаратилмоқда.

Ўзбекистон Экологик партияси Тошкент шаҳар кенгаши ва Шайхонтоҳур туманидаги 23-сонли Болалар мусиқа ва санъат мактаби ҳамкорлигида ёш ижодкорларни қўллаб-қувватлаш, юртимизнинг гўзал табиати ҳақида сўзловчи янги ижод намуналарини яратиш ва бу орқали бошқаларнинг ҳам атроф муҳит муҳофазасига бўлган дахлдорлик ҳиссини ошириш мақсадида Абдулла Қодирий уй музейида ташкил этилган «Табиат учун бирлашайлик» шиори остидаги тадбир ана шундай амалий ҳаракатлардан бири бўлди.

Тадбирда Олий Мажлис Қонунчилик палатаси депутати Носиржон Аминов, Ўзбекистон Экологик партияси Тошкент шаҳар Кенгаши раиси Севара Файзиева ва Олмазор туман партия ташкилоти раиси Шаҳноза Умархўжаевалар сўзга чиқиб, атроф муҳитни муҳофаза қилиш, табиий бойликлардан оқилона фойдаланиш, инсон саломатлигига салбий таъсир кўрсатувчи омилларнинг олдини олиш ҳар бир фуқаронинг бурчи эканлиги, аҳоли, айниқса, ёш авлоднинг бу борада мамлакатимизда олиб борилаётган изчил ислоҳотлар, кўрилаётган чора-тадбирлардаги иштирокини янада ошириш лозимлигини таъкидлашди.

Тадбир давомида, санъат мактаби ўқувчилари томонидан «Табиат учун бирлашайлик» шиори остида чизилган суратлар тақдим этилди. Ёш ижодкорларга Ўзбекистон Экологик партиясининг фахрий ёрлиқ ҳамда эсдалик совғалари топширилди.