Польшалик журналист Магдалена Пернет референдум билан боғлиқ жараёнлар ҳақидаги фикрлари билан ўртоқлашди:

– Конституцияга ўзгартиришлар киритиш Ўзбекистон учун, шубҳасиз, тарихий лаҳзадир. Мамлакатингиз Асосий қонунига 60 фоиздан кўпроқ ўзгартириш киритилгани эътиборга молик.

Овоз бериш жараёнини кузатиш учун таклиф этилган кузатувчилар орасида деярли бутун дунёдан мутахассислар, жумладан, кўплаб журналистлар ҳам бор эди.

Аввало, референдум жуда муҳим ва кенг кўламдаги тадбир эканини, ташкилотчилар уни фуқаролар учун шаффоф тарзда ўтказишга муваффақ бўлганини алоҳида таъкидлашни истардим.

Ўзбекистонликлар овоз бериш 30 апрель куни бўлиб ўтиши ҳақида референдумга 45 кун қолганида хабардор қилинган. Референдум ҳақида оммавий ахборот воситаларида, ижтимоий тармоқларда кўп маълумотлар берилган, эълонлар кўчаларда ҳам бор эди.

Ўзбекистонга келганимга бир неча кун бўлди. Референдум олдидан одамлар билан мулоқот қилганимда бу тадбир ўтказилишидан хабари бўлмаган бирорта одамни учратмадим.

Овоз бериш жараёни юқори даражада режалаштирилган, унда ҳамманинг иштирок этиши учун барча имкониятлар яратилган. Шифохоналардаги фуқаролар, чет элда бўлиб турганлар шулар жумласидандир.

Конституция мамлакатнинг янги тараққиёт йўлига мослаштирилиши давлат ривожининг кейинги босқичларини осонлаштиради ва тезлаштиради.