Словакия Республикасидан ташриф буюрган кузатувчи, «Финансовые новости» нашри бош муҳаррири Владимир Бачишин ЎзА мухбирига берган интервьюсида қуйидагиларни таъкидлади:

– Ўзбекистонда бўлиб ўтган референдумда овоз бериш жараёнларини Швейцария соати каби дейиш мумкин – ҳаммаси яхши йўлга қўйилган. Технологиялар аниқ ишламоқда. Мен Бухорода бўлдим: яхши тайёргарлик кўрилган. Участка комиссияси аъзолари овоз беришга келган фуқароларга барча тартибларни батафсил тушунтиришди. Барча жараёнлар кетма-кетлиги яхши режалаштирилган. Ҳамма жойда кузатувчилар, комиссиялар бор. Референдум халқаро стандартларга тўлиқ жавоб беради.

Европа Иттифоқи мамлакатлари билан солиштирганда, Ўзбекистон Конституцияси лойиҳасида аҳолига нисбатан давлатнинг кўпроқ мажбуриятлари кўрсатилган. Мен барча фуқароларни интернет билан бирдай таъминлаган давлатни билмасдим, бу камдан-кам учрайдиган ҳолат. Иккинчи эътиборимни тортган жиҳат – ёшлар масаласи. Ҳеч қаерда ёшларни иш ва уй-жой билан таъминлаш кафолатланмаган. Лекин, камбағаллар учун дастурлар мавжуд. Мисол учун, Чехия ва Словакияда бу 100 фоиз кафолатланмаган.

Ҳамма ушбу сиёсий тадбирдан хабардор экан. Буни овоз беришда қатнашган иштирокчиларнинг фоизи ҳам кўрсатиб турибди. Ўзбекистонда, умуман, Марказий Осиёда аҳолининг сиёсий фаоллиги кўпроқ сезилади.