«Ёшликда олинган билим, тошга ўйилган нақшдир» деган пурмаъно нақл бор халқимизда. Демак, табиатга бўлган меҳр, экологик таълим-тарбия ҳам болаликданоқ ёш авлод онгига сингдирилса, бу хислат анъана сифатида авлоддан-авлодга ўтиб бораверади.

Фарғона вилоятида Ўзбекистон Экологик партияси Марказий кенгаш раиси Абдушукур Ҳамзаев иштирокида Фарғона шаҳридаги Президент мактабида бўлиб ўтган ёшлар билан мулоқот ҳам айнан шу мавзуга бағиш­ланди.

«Табиий бойликларимиз ва неъматлардан оқилона фойдаланиш, экологик мувозанатни асраш, атроф муҳитни ифлослантирмаслик, ўз теварак-атрофимизни покиза тутиш – бу ҳар биримизнинг қўлимиздан келадиган оддий ва лекин умумий замин манфаати учун ғоят муҳим хислат ва бурчимиздир», – деди Абдушукур Ҳамзаев.

Тадбирда табиатни асраб-авайлашда ёшларга табиатсеварликни ўргатиш, атроф муҳитга эътиборли қилиб тарбиялаш муҳим вазифалардан бири экани ҳам эътироф этиб ўтилди.