Навоий вилояти «Шарқ гули» нодавлат нотижорат ташкилоти томонидан «Кексалари ардоқланган юрт» лойиҳаси доирасида Томди туманида соғломлаштириш маркази ишга туширилди.

Мазкур фаолият халқ депутатлари вилоят Кенгаши ҳузуридаги ННТ ва фуқаролик жамияти бошқа институтларини қўллаб-қувватлаш жамоат фонди маблағлари ҳисобига амалга оширилди. Бугунги ислоҳотларимиз негизида турган кексаларга эътибор ва ғамхўрликни кучайтириш ҳамда улар ҳаёти мазмуни ва сифатини ошириш, пенсия таъминоти ва бошқа йўналишларни ривож­лантириш мазкур марказ фаолиятининг асосий йўналишларини ташкил этади. Шу мақсадда норматив-ҳуқуқий база янада такомиллаштирилаётгани эътиборга моликдир.

Марказда кексаларимиз ўз саломатлигини мустаҳкамлаши учун спорт инвентарлари ва фитобар ташкил этилган бўлиб, ҳозирги кунда нафақат кексаларимиз, балки шу ерда яшаётган барча аҳоли ишдан бўш вақтларида мунтазам шуғулланиб келишмоқда. Шунингдек, марказ томонидан кекса отахон ва онахонларимизни ижтимоий қўллаб-қувватлаш, дам олиш масканларига бепул йўналтириш, зарур ҳолларда турли ижтимоий таъминот воситалари билан таъминлаш ишлари йўлга қўйилаётгани қувонарлидир.

Сурайё МАНСУРОВА,

Навоий вилояти «Шарқ гули»

ННТ ташкилот раҳбари,

Ўзбекистон Экологик партияси аъзоси