Бўлар элнинг болалари бир-бирин дер, деган нақлни кўп эшитганмиз. Бу пурмаъно ибора айни синовли кунлар учун айтилгандек. Халқимиз бир-бирига шундай синовли, қор-қировли кунларда йўлдош, елкадош бўлаётгани ҳар биримизнинг қалбимизда ажиб бир эзгу ҳисларни уйғотади.

Юртимизда кузатилаётган аномал совуқ сабабли кўнгилларга меҳр, илиқлик улашиш мақсадида Нукус шаҳри «Байтерек» МФЙ раиси С.Эсбосинова, Олий Мажлис Қонунчилик палатаси депутати Лейла Сейтова, ЎЭП Қорақалпоғистон республикаси партия ташкилоти ҳамкорлигида «Меҳр ҳаракати» акцияси ташкил этилди.

Бу хайрли тадбирда Нукус шаҳри «Байтерек» МФЙ ҳудудида дошқозонда 70 кг ош дамланиб,  «Байтерек» МФЙда яшовчи ижтимоий ҳимояга муҳтож, боқувчисини йўқотган оилаларга, ёлғиз яшовчи кексаларга бепул тарқатилди.

Шу билан бирга партия фаоллари кам таъминланган бемор инсонлар ҳолидан хабар олди. Ҳар қандай шароит ва вазиятда ҳам инсонийлик, бағрикенглик ҳамроҳ бўлган юртдошларимиз борлиги қалбимизни фахрга тўлдиради, албатта.