Янги 2023 йилга «Инсонга эътибор ва сифатли таълим йили» деб ном берилгани давлатимиз раҳбари ташаббуси билан олиб борилаётган изчил ислоҳотлар бош мезонида инсон ва унинг қадрини улуғлаш, муносиб яшаш, иш ва турмуш шароити яратишдек улуғвор мақсадлар турганини яна бир бор тасдиқлаб берди.

Бугун шиддатли даврнинг ўзи олдимизга қўяётган долзарб масалалар, уларни тизимли ҳал этиш – Ўзбекистон Экологик партияси ҳамда ундан сайланган депутатларнинг доимий вазифаси. Жумладан, Ўзбекистон Экологик партияси Тошкент шаҳар кенгаши ҳамда маҳаллий Кенгаш депутатлари томонидан бу борада қатор тадбирлар ташкил этилмоқда.

Куни кеча пойтахтимизнинг Чилонзор туманида партиямиздан халқ депутатлари Тошкент шаҳар Кенгаши депутати Акмал Эргашев ташаббуси билан ана шундай хайрия тадбири ташкил этилди. Депутат ва Ўзбекистон Экологик партияси Тошкент шаҳар Кенгаши вакиллари Чилонзор туманининг «Яккатут», «Катта Хирмонтепа», «Ҳайробод», «Шарқ тонги», «Хонтўпи», «Шарқ», «Шараф», «Гулистон», «Баҳорис­тон», «Бектўпи» ва «Ал-Хоразмий» маҳаллаларида истиқомат қиладиган кам таъминланган, ижтимоий ҳимояга муҳтож, ногиронлиги бор, жами 120 нафар оилага турли хилдаги озиқ-овқат маҳсулотлари тарқатилди.

Ушбу совғаларини қабул қилиб олган барча аҳоли вакиллари депутатлар ва ташкилотчилардан миннатдор бўлиб, дуолар қилишди. Депутатни халқ сайлайди ва унга ишонч билдиради. Шундай экан, халқнинг муаммоларини ўзиникидек билиб, уларнинг қувончу дардига шерик бўлаётган халқпарвар депутатларимиз янада кўпайсин деймиз.

ЎЭП Тошкент шаҳар

партия ташкилоти