Бугун экологик масалалар дунёнинг доимий диққат марказида турган бир даврда яшаяпмиз. Бутун жаҳонда бўлгани каби мамлакатимизда ҳам бу масала давлат ва нодавлат ташкилотлари, қолаверса, ҳар бир фуқаронинг кундалик фаолиятида муҳим аҳамият касб этиб бормоқда.

Айниқса, охирги йиллардаги ислоҳотлар табиат ва атроф муҳит борасидаги қарашларимиз ва фаолиятимизни анча тизимли ва самарали бўлишига олиб келди. Бундан тўрт йил муқаддам Ўзбекистон Экологик партиясининг ташкил этилиши ҳам юртимиз ҳаётида ўзига хос бир муҳим ҳодиса бўлди. Мазкур партия нисбатан ёш бўлишига қарамай, кўплаб инсонларни ўз ғояларига ишонтира олди. Бугунги кунда аҳолининг салмоқли қисми, кўпинча ёшлар ўз келажагини мазкур партия фаолияти билан уйғун кўраётганлари қувонарли ҳолдир.

Экологик партия ташаббуси билан амалга оширилган бир-биридан муҳим лойиҳаларни кўриб, ушбу тузилма давлат ва жамият ҳаётида муҳим аҳамиятга эга эканига ҳаммамиз гувоҳ бўлиб турибмиз. Партия фаолият юрита бошлаган бу тўрт йил тарих учун катта муддат эмас. Шунга қарамай, Ўзбекистон Экологик партияси ҳаётимизда ўз ўрнига эга эканини исбот эта олди, деб ўйлайман. Келгусида амалга оширадиган бутун фаолиятимизда мана шу ўринни янада мустаҳкамлаб боришга ҳисса қўшишимиз зарур.

Экология, айниқса, ичимлик сув масалалари глобал муаммога айланиб бораётгани биз нафақат бугунги, балки келажак авлодларимизни ҳам ўйлаб иш юритишимиз лозимлиги тақозо этмоқда.

Ўзбекистон Экологик партияси ўз олдига қўйган режа ва мақсадларини доимо халқ билан биргаликда амалга ошириш йўлидан бормоқда. Сабаби келажак учун ҳаммамиз жавобгармиз.

Улуғбек ИБРОҲИМОВ,

Ўзбекистон Экологик партияси

Боғот туман кенгаши раиси