Депутатлар халқ билан давлат орасида кўприк бўла олсагина у ўз сайловчиларининг ишончини қозонади, ўз вазифасини аъло даражада уддалайди.

Шу сабабли ҳам Тошкент вилояти ҳокимлиги томонидан аҳолининг ижтимоий ҳолатини ўрганиш мақсадида шакллантирилган ишчи гуруҳ таркибига Ўзбекистон Экологик партияси Тошкент вилояти партия ташкилоти раиси, вилоят Кенгаши депутати Фурқат Аҳмеджанов ҳам қўшилган. У сўнгги кунларда вилоятдаги туман партия ташкилоти раислари иштирокида Қуйи Чирчиқ туманидаги 128 та аҳоли хонадонларини ўрганди.

Ўрганиш давомида кам таъминланган ҳамда ногиронлиги бўлган оилаларга маиший техникалар, қурилиш маҳсулотлари ва бошқа рўзғор учун зарур жиҳозлар берилди.

Депутатларимиз халқ орасида бўлар экан, уларнинг муаммоси, дарду ташвиши билан яқиндан танишиш ва ушбу муаммоларни ҳал қилиш имкони кенгаяверади. Зеро, халқнинг орзу-ўйлари, ташвишидан хабардор бўлиш, унга ёрдам бериш ҳар бир депутатнинг чин инсоний бурчидир.