Прогнозлаштириш ва макроиқтисодий тадқиқотлар институти (ПМТИ) экспертлари 2023 йил учун базавий инфляция ва мавсумий ўзгарувчан инфляция (мева-сабзавотлар нархи) ўзгаришини айтишмоқда.

Маълум қилинишича, инфляция таркибий қисмлари учта асосий гуруҳга ажратиб таҳлил ва прогноз қилинган. Булар:

– базавий инфляция;

– тартибга солинадиган нархлар;

– мавсумий ўзгарувчан нархлар (мева ва сабзавотлар) инфляцияси.

Базавий инфляцияни ҳисоблашда мавсумий ўзгаришларга таъсирчан товар ва хизматлар турлари ҳисобга олинмайди.

Тартибга солинадиган нархлар инфляцияси маъмурий тартибга солинадиган товар ва хизмат турларидан иборат бўлади. Мавсумий ўзгарувчан инфляцияни ҳисоблашда эса Ўзбекистон шароитида асосан мева ва сабзавотлар нархи инобатга олинади.

Ўзбекистон ҳолатида базавий инфляция ҳиссасига Истеъмол нархлари индекси (INI) ўсишининг 78 фоизи тўғри келади ва одатда пул-кредит сиёсати қарорлари ушбу инфляция натижалари асосига қурилади.

Мева ва сабзавотлар истеъмол нархлари индекси (INI) саватидаги энг ўзгарувчан гуруҳлардан бўлиб, бутун INI саватининг 8 фоизини ташкил қилади.

ПМТИ прогноз натижаларига кўра, 2022 йил учун базавий инфляция 11,2 фоиз ҳамда мева ва сабзавотлар инфляцияси 15,9 фоиз,

2023 йил учун эса базавий инфляция 10,5 фоиз ҳамда мева ва сабзавотлар инфляцияси 22,1 фоизни ташкил этиши кутилмоқда.

Ўзбекистон 2022 йилнинг январь-октябрь ойларида қиймати 903,3 миллион долларга тенг бўлган 1,4 миллион тонна мева ва сабзавотлар экспорт қилган.