Мамлакатимизда сўнгги йилларда йўлсозлик соҳасини ривожлантириш, йўлларни халқаро талаблар даражасига келтиришга алоҳида эътибор қаратилмоқда.

Йўлсозлар томонидан замонавий йўл, йўл ўтказгич, кўприк, пиёдалар учун ер ости ва ер усти йўллари бунёд этилаётгани аҳолининг узоғини яқин қилиб, ҳаракат хавфсизлигини таъминлашга хизмат қилмоқда.

Таъкидлаш жоиз, Олий Мажлис Қонунчилик палатаси депутатлари ҳар ойнинг охирги ҳафтасида ўз сайлов округ­ларида бўлиб, аҳоли билан мулоқотлар ўтказади. Мазкур жараёнда сайловчилардан келиб тушган мурожаатлар қонун билан берилган ваколатлар доирасида ҳал этилади.

Айрим масалалар депутат назоратига олиниб, уларнинг ечими юзасидан тегишли вазирликларга депутатлик сўрови юборилади.

Олий Мажлис Қонунчилик палатаси депутати, Ўзбекистон Экологик партияси фракцияси аъзоси Носиржон Аминовнинг 87-Ангрен сайлов округида сайловчилар билан бўлиб ўтган учрашувда аҳоли ўзларининг талаб ва эҳтиёжларидан келиб чиққан ҳолда Тошкент вилоятининг Оҳангарон тумани ҳудудидан ўтган халқаро аҳамиятига эга А-373, М-39 автойўли «Гулистон – Бўка – Ангрен – Қўқон ва Андижон орқали – Ўш» автомобиль йўлининг Чинор, Четсув ҳамда Кўксарой МФЙлари жойлашган қисмида аҳолининг ишга бориши ва кундалик юмушларини бажаришда, фарзандларини эса таълим муассасаларига қатнаши учун хавфсиз ва қулай шароитлар яратиб бериш мақсадида «Тошкент – Ўш» катта магистрал йўлининг 190 – 210 км.да пиёдалар ўтиш йўлакларини ўрнатиб беришда амалий ёрдам сўраб мурожаат қилишди.

Носиржон Аминов ушбу масалани ўз назоратига олиб, мазкур мурожаат юзасидан Ички ишлар вазирига депутатлик сўрови юборди. Бугунги кунда ушбу депутат сўрови асосида белгиланган ҳудудларга йўл белгилари ўрнатилиб, йўл чизиқлари чизилди.