Давлатимиз раҳбари айтганидек, «Депутат бўлиш, халқ ишончини қозониш ва уни муносиб равишда оқлаш – бу осон эмас. Бундай шараф ҳар кимга ҳам насиб этмайди.

Депутат – фикри-зик­ри билан халққа энг яқин одам, доимо эл-юртнинг ташвиш ва муаммолари билан яшайдиган, катта билим ва тажрибага эга бўлган шахс».

Дарҳақиқат, халқ уларга бежиз катта ишонч билдирмаган. Ўзи дуч келаётган муаммолар ечимига мутасаддилар эътиборини қаратишда, кўп-кўп масалалар ҳал этилишида депутатдан имдод кутади сайловчи. У эса шу халқнинг вакили сифатида аҳоли манфаатларини ўйлаб таклиф, муаммо ва мурожаатларини тинглаб, шу асосда фаолият олиб бориши шарт.

Ўзбекистон Экологик партиясидан халқ депутатлари Асака туман кенгашига сайланган Ҳусанбой Дадабоев аҳоли ишончини қозониб келаётган ана шундай депутатлардан бири. «Лабгардон» маҳалла фуқаролар йиғинида истиқомат қилувчи тўрт мингдан ортиқ аҳоли бу инсонни узоқ йиллар дуоларида тилга олса не ажаб.

Уйингизда бир кун сув бўлмаслигини тасаввур қилиб кўринг. Ичиш учун амаллаб ташиб келарсиз, аммо идиш ювиш, уй-рўзғор ишлари, тозалик-озодалик учун озмунча сув керакми? Унча сувни ташиб келтиришни тасаввур қилишнинг ўзи қийин.

«Лабгардон» маҳалласи аҳоли, айниқса бекалари анчадан буён ана шундай сув муаммосидан қийналиб келишарди. Бунга сабаб эса сув чиқарадиган насос­нинг ишдан чиққанлиги бўлган. Муаммони бартараф қилишда ёрдам сўраб аҳоли Ҳусанбой акага мурожаат билан чиқди. Депутат «Сувоқава» корхонаси туман бўлими билан боғланиб, аҳолининг илтимосини уларга етказди ва қарийб беш мингга яқин инсонларнинг хонадонида яна зилол сув пайдо бўлди.

Аслида ҳам депутатнинг иши мажлисларда қўр тўкиб ўтиршу, фақат турли туман тадбирларда иштирок этиш эмас. Унинг вазифаси ўзини сайлаган халқнинг ишончини оқлаш, кичкина бўлса ҳам оғирини енгил қилишдир.