Халқимизда «бош омон бўлса дўппи топилади», деган омади бир гап бор. Дарҳақиқат, инсон тирик ва соғ-саломат бўлса ҳар қандай муаммонинг ечими топилади, қийинчилик­лар аста-секин ортда қолиб, ҳаммаси ўз изига тушади.

Баъзан ана шундай ташвиш­лардан ўтишда кимнингдир ёрдамига, озгина суянчи, биргина йўл кўрсатишига эҳтиёж сезилади.

Ўзбекистон Экологик партиясидан Олий Мажлис Қонунчилик палатаси депутати Ислом Хушвақтов томонидан Чироқчи туманида аҳоли учун ташкил қилинган сайёр қабулда фуқаролар дарди тингланди, муаммолари ўрганилди. Кимларнингдир муаммоси ечими учун бир яхшилик турткиси берилди. Сайёр қабул туман Халқ қабулхонаси ҳамда туман Бандликка кўмаклашиши марказида турли соҳа мутасаддилари ҳамроҳлигида ўтказилди.

Бугун халқимиз орасида бошимда бошпанам бўлсин, дея кунни тунга улаб, тинимсиз меҳнат қилаётганлар оз эмас. Афсуски яшаш, ижара ҳақи, еб-ичиш, кийиниш, болалар учун ажратиладиган ҳаражатлар – хуллас булардан орттириб уй-жой олиш осонмас. Қабулга ана шундай уй-жой билан таъминлаш масаласида келганларнинг шарт-шароити, оилавий аҳволи ўрганилди. Уларнинг муаммосини ижобий ҳал қилиш бўйича ечим изланди ва тегишли тартибда ҳужжатлар расмийлаштирилди.

Бундан ташқари ижтимоий ҳимояга муҳтож кишилар, ёлғиз қариялар, боқувчисидан маҳрум бўлганлар, ёлғиз ота ёки оналарни қийнаётган муаммолар билан ҳам танишилди. Уларнинг молиявий аҳволини яхшилашга кўмаклашиш бўйича ўзаро муҳокамалар ўтказилди. Фуқароларнинг ҳунари бор ё йўқлиги, нималарга қизиқиши, мақсадлари бўйича маълумот олиниб, ижтимоий ҳолатини яхшилаш йўлида тавсиялар берилди, кўмаклашиш бўйича эса аниқ қарорлар қабул қилинди.

Саломатлигида муаммоси борларнинг реабилитацияси, тиббий кўрикдан ўтиши ва даволаниши ҳам алоҳида ўрганилди. Бу масалага эса пойтахтдан келган мутахассис-шифокорлар ёрдами билан ижобий ечим топилди.

Аҳоли бандлигини таъминлаш бугун камбағалликка қарши курашда муҳим омил саналади. Шу маънода депутат сайёр қабулда ишсиз фуқаролар билан ҳам обдон суҳбат қурди. Уларни касбга йўналтириш, зарур бўлса касбга ўқитиш ва келгусида бандлигига кўмаклашиш бўйича келишиб олинди.

Депутат билан учрашувда кредит ва таълим масалаларида мурожаат қилганларнинг ҳам арз-доди назардан четда қолмади. Асосийси, мурожаат билан умид боғлаб келган ҳеч бир фуқаро умидсиз кетмади. Қўлларини очиб, юрт тинчлигини сўраб, саховатли ва халқ билан яқин бўлаётган инсонлар ҳақига дуолар қилишди.

Ўзбекистон Экологик партияси

Қашқадарё вилоят кенгаши партия

ташкилоти матбуот хизмати