Илгари ҳар бир аёл, ҳар бир йигит-қиз бирор бир ҳунарни билмаслиги уят саналган. Кимдир гилам тўқиган, кимдир кашта тиккан, кимдир дурадгорлик қилган. Ҳунари орқасидан оиласини ҳалол боққан, едириб ичирган.

Юртимизда ҳунармандчилик қадимдан тараққий топган, турли бежирим буюмлар яратиш, кундалик ҳаётда асқатадиган жиҳозлар тайёрлаш, шу орқали ўз меҳнати билан одамларга наф келтириш қадрият даражасига кўтарилган. Бугунги кунда Ўзбекистонда ҳунармандлар томонидан ишлаб чиқариладиган буюмлар йўналишлари сони ҳам кундан-кунга ошиб бораётгани қувонарли.

Ҳозирда ҳунармандларимиз ички ва ташқи бозор учун маҳсулотлар ишлаб чиқаришмоқда. Бу маҳсулотлар ўзининг сифати, бадиий жиҳатдан юксаклиги, табиийлиги ва миллий ўзлигимиз, тарихий анъаналаримизни ўзида уйғунлаштиргани билан ҳам аҳамиятлидир.

Айнан шундай беқиёс анъаналаримизни ўзида жам этган Ҳунармандлар маскани Шаҳрисабзнинг Уймовут маҳалласида ҳам фойдаланишга топширилди. 2-сектор ҳудудида  ҳунарманд Зайнура Ҳошимова шаҳар прокурорининг бевосита ёрдами билан маҳалла ҳудудида ҳунармандлар марказини ташкил этди.

Пиру бадавлат момоларимиздан бизга мерос бўлиб келаётган амалий безак турларининг энг қадимий ва кенг тарқалган тури каштачиликдир. Халқнинг ҳаёти ва урф-одатлари билан чамбарчас боғлиқ бўлган бу санъат тури қўли гул чеварлар томонидан асрлар оша янада сайқалланиб келмоқда. Ушбу марказда ҳам ҳунармандчиликнинг айнан шу турига катта эътибор қаратилган. Қўл меҳнати билан яратилган бетакрор, ранг-баранг бундай кашталар, сўзаналар хорижда ҳам арзон баҳоланмайди.

Марказни ташкил этишдан асосий мақсад сектор ҳудудидаги маҳаллаларда истиқомат қилаётган аёллар ва ёшлар дафтарига рўйхатга олинган, тикувчилик, тўқувчилик, каштачиликка қизиқувчи хотин-қизларнинг  бандлигини  таъминлаш, малакасини ошириш, устоз-шогирд анъаналарини давом эттиришдан иборат. Қолаверса, аёлларимиз учун яхшигина даромад ҳам келтиради.

Марказнинг очилиш маросимида иштирок этган Шаҳрисабз шаҳар прокурори Баҳром Бекбўтаев, шаҳар ҳокимининг ўринбосари Муҳайё Алмирзаева, шаҳар кенгаши депутати, ҳоким ёрдамчилари Гуллола Мирзаева ва Нодир Маннонов маҳаллалардан келган хотин-қизларга корхона  фаолияти ҳақида  батафсил  маълумотлар беришди.

— Энди  уйда  ўтирган ҳунармандчиликка  қизиқувчи аёлларимиз учун  энг қулай имконият ва шароит яратилди. Ҳунармандчиликнинг барча турларини ўрганишни хоҳловчи хотин-қизлар учун марказ эшиклари доимо очиқ,— дейди ҳунарманд Зайнура Ҳошимова.

Ушбу марказда қимматбаҳо гиламлар тўқишга ҳам алоҳида эътибор қаратилиб, барча шароитлар яратилган.

«Ҳунарли мой ошар, ҳунарсиз лой ошар», деган мақол бор элимизда. Дарҳақиқат, бугунги шиддатли ўзгариш­лар замонида бирор бир ҳунарнинг бошини тутиш, айниқса, хотин-қизларимизнинг хоҳ у замонавий, хоҳ қадимий бўлсин, бирор бир ҳунар турини ўрганиши эртаги куни учун сармоя бўлади. Билимга, касб ўрганишга тикилган сармоя эса доим ўзини ортиғи билан оқлаган.