Республика «Оила» илмий-амалий марказининг бир гуруҳ олимлари ҳаммуаллифлигида мамлакатимиз тарихида илк бор «Қизлар энциклопедияси» китоби чоп этилди. 

Китоб хилма-хил мавзуларга бой, рангли, замонавий дизайн услубида яратилган бўлиб, унда ўсмир қизларда юз бераётган руҳий ва физиологик жараёнлар, қизларнинг миллий-маънавий, замонавий қиёфаси, ижтимоий ҳаётдаги ўрни ҳақида сўз юритилган. Ҳар бир мавзуга алоҳида ёндашилиб, миллий анъаналаримиз, қадриятларимизнинг ўзига хос руҳи сингдирилган. Қизиқарли тест ва маслаҳатлар ўрин олган.

— Қизларимиз айрим саволларга бошқалар ёрдамида жавоб топишга баъзан андиша қилишади, — дейди марказ раҳбари Ҳафизахон Мамадалиева. — Мазкур энциклопедияда биз имкон қадар ана шундай саволларни ҳам қамраб олишга ҳаракат қилдик. Уни Меҳрибонлик уйлари ва мактабларга бепул тарқатишни режалаштиряпмиз.