Яхшидан боғ қолар, деб ота-боболаримиз бежиз айтишмаган. Юртимиз бўйлаб умуммиллий ҳаракатга айланаётган «Яшил макон» лойиҳаси ҳам ана шу эзгу қадрият бардавом бўлишига хизмат қилмоқда. Ўзбекистон Журналистлар ижодий уюшмаси ва бир қатор ОАВ вакиллари ҳам бу хайрли ишга ҳисса қўшиш мақсадида пойтахтимизнинг Боғишамол кўчасида кўчат экиш тадбирига жам бўлдилар.

Ўзбекистон Журналистлар ижодий уюшмаси дарахт экишдек савобли ишда соҳа вакилларининг муносиб ҳиссасини таъминлаш мақсадида тадбирга бош-қош бўлди. Уюшма раиси Олимжон Ўсаров ўтқазилган кўчатлар вояга етиб, то кўкка бўй чўзгунгача уларни парваришлаш масъ­уллигини Журналистлар ижодий уюшмаси ўз зиммасига олишини таъкидлади.

– Бир яхши амални бошладикми, уни албатта охирига етказишимиз керак. Шу маънода, бир дона бўлса ҳам кўчат экиш ярим амал, унинг кейинги парвариши, дарахтни сув билан таъминлаб туриш унинг қолган ярми ҳисобланади, – дейди Ўзбекистон Журналистика ва оммавий коммуникациялар университети ректори Шерзодхон Қудратхўжа. – Бу қилаётган ишларимиз хўжакўрсинга бўлиши, кампаниябозлик қилиш керак эмас. Ҳадемай ёз келиши билан дарахтлар сувсизликдан қийнала бошлайди. Шунинг учун ҳам биз келишиб, ҳар бир экилган дарахтни парвариш қилиб, керак бўлса сентябр ойигача сув билан таъминлаймиз.

Мансурбек ЖАББОРОВ,

«Оила ва табиат» мухбири