Ўзбекистон Миллий матбуот марказида Ўзбекистон Журналистлари ижодий уюшмаси ва бир гуруҳ соҳа фидойилари ташаббуси билан қисқа муддат ичида чоп этилмай қолган «Ўзбекистон матбуоти» журналининг тақдимоти ўтказилди.

Фахрий журналистлар, уюшманинг вилоят бўлими вакиллари, тадқиқотчилар ва ёш журналистлар иштирокидаги тадбирни Ўзбекистон Журналистлари ижодий уюшмаси раиси Олимжон Ўсаров олиб борди. Тақдимот иштирокчиларига яқин кунлардаги режалар, журналларнинг формати, муассислари ва ҳомийлари ҳақида маълумот берилди. Журналнинг кейинги фаолияти ва унда чоп этиладиган илмий, маърифий материаллар ҳақида мулоҳазалар юритилди. Таклифлар ва танқидлар тингланди.

– «Ўзбекистон матбуоти» журналини қатор ҳамкор ташкилотлар ва ҳомийлар ёрдамида чоп этишни йўлга қўйганимиз билан кейинги тақдири Ўзбекистонда фаолият юритаётган журналистларга, шу соҳада таҳсил олаётган талабаларга ҳам боғлиқ, – дейди уюшма раиси Олимжон Ўсаров. – Журнални ойда бир марта чоп этилиши режалаштирилган. Журналга Чўлпондек улуғ маърифатпарвар инсоннинг қўли теккан. Қолаверса, ушбу журнал ҳар доим ҳам ўзбек матбуотининг юзи ҳисобланган. Мен ҳар доим журналистларни бирлашишга чақирганман. Келинглар, мана шу журнални «жонлантириш»га, саҳифаларини бойитишга ўз ҳиссамизни қўшайлик.

Яна бир хушхабар сифатида шуни айтиб ўтмоқчиманки, айрим сабабларга кўра «Муштум» журнали ҳам нашр этилмай қолганди. Ташаббускорлар кўмаги билан журналнинг илк сони босмахонага топширилди. У ҳам яқин кунларда чоп этилади. Маълумот учун: журнал бир асрлик шонли тарихни босиб ўтган маърифий нашрлардан бири ҳисобланади.