Тошкент шаҳрида Чилонзор тумани 7-мавзенинг 49-50 уйларида дарахт шохлари кесилиб, «санитар шакл» берилмоқда. Бундай ҳолатни  республикамиз аҳоли пунктларида кўплаб кузатиш мумкин, деб ёзади ekolog.uz.

«Санитар шакл» дейилганда аслида дарахтнинг қуриган, касалланган шохларини кесиб ташлаш назарда тутилади. Бу Ўзбекистон Республикаси Вазирлар Маҳкамасининг 2019 йил 17 январдаги «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасида рухсат бериш тартибини янада такомиллаштириш тўғрисида»ги қарорига асосан амалга оширилади.
Мазкур ҳужжатда «Санитария мақсадида дарахтлар ва буталар танасининг бир қисми: қуриётган ёки қуриб қолган; шакли хунук ўсиши натижасида ҳовли, кўча ва бошқа жамоат жойларининг кўринишини бузиб турган; касалликка чалинган; турли инфратузилмалар фаолиятига халақит бераётган; шохлари касаллик тарқатувчи ҳайвонлар ва ҳашаротларнинг манбаига айланган; шунингдек, шамол, қор ёки бошқа табиий жараёнлар таъсирида синиши ёки синиш эҳтимоли натижасида одамларнинг ҳаёти ва соғлиғига ҳамда юридик ва жисмоний шахсларнинг мол-мулкига хавф солаётган ҳолатларда кесилади», дейилган.
Аммо суратлардан кўриб турганимиздек, дарахтларнинг ям-яшил, соғлом шохлари кесилмоқда. Ҳар қандай биолог ёки агротехник мутахассис дарахтларни буташ эрта баҳор ёки кеч кузда, улар уйғонмасидан амалга оширилиши зарурлигини айтади. Россиянинг agrarnyisector.ru сайтида ёзилишича, «Дарахтларни ёзда буташ тавсия этилмайди, бу ҳолатда дарахтларнинг барги тўкилиб, дарахт танасида мураккаб моддалар тўплана бошлайди ва дарахтнинг ўсиб ривожланишига тўсқинлик қилади». Оддий сўз билан айтганда, ёзда буташ дарахт касал бўлиб қолиши ёки қуришига олиб келиши мумкин.
Бугунги ёз чилласида шаҳарларда дарахт­ларнинг аёвсиз буташларини кўриб, Ободонлаштириш бошқармаларида бунга рухсат бераётган биолог-мутахассислар борлигига шубҳаланасан, киши…