Мамлакатимиз хотин-қизлари орасида олти академик,

беш юздан ортиқ фан доктори, беш мингга яқин фан номзоди, минглаб ёш тадқиқотчилар, катта илмий изланувчи ходималар фаолият кўрсатмоқда.

Бу ҳақда Ўзбекистон Хотин-қизлар қўмитаси ташкил этган аёлларнинг илм-фан тараққиётида тутган ўрнига бағишланган давра суҳбатида маълум қилинди. Бугун мамлакатимиз олий таълим муассасаларида бакалавр йўналишида таълим олаётганларнинг 42 фоизи, магистрларнинг 35 фоизи қизлардир.

— Шу йилнинг 4 февраль куни фаолият бошлаган «Ёш олималар академияси» илмий иш қилишни мақсад этган аёллар учун очилган яна бир эшик бўлди, — дейди «Олима» уюшмаси қошидаги «Ёш олималар академияси» раиси, филология фанлари номзоди Нозима МУРОДОВА.  — Академиянинг фаолият йўналиши Жаҳон Ёшлар академияси (Global Youth Academy) ҳамда унга аъзо 22 мамлакат тажрибаси ўрганилган ҳолда ишлаб чиқилди. Мақсадимиз — илмий соҳада ютуққа эришган аёлларнинг илмий ишларини тарғиб этиш, уларнинг халқаро миқёсда ўтказиладиган анжуманларда иштирок этишига кўмаклашиш, халқаро журнал ва тўпламлар учун мақолалар тайёрлашида ахборот кўмагини бериш.

— «Ёш олималар академияси»га аъзо бўлиш тартиби қандай? Бўлажак аъзолар учун маълум шарт ва талаблар борми?

 — Академияга аъзо бўлиш эркин ва ихтиёрий. Бунинг учун махсус анкета тўлдириш лозим. Аъзо бўлишни хоҳловчилар olima.academy@gmail.com электрон манзилига сўров юборсалар, уларга анкетанинг электрон нусхаси жўнатилади. «Ёш олималар академияси»га 40 ёшгача бўлган илмий изланувчи, тадқиқотчи, олима аёллар қабул қилинади.

Дилроз АБРАЕВА,

«Оила даврасида» мухбири