Аҳоли турар жойларида содир бўлаётган ёнғинлар таҳлили шуни кўрсатмоқдаки, фуқаролар ёнғин хавфсизлиги қоидаларини билсалар-да, унга лоқайдлик билан қарайди. Оқибатда бу кутилмаган катта фалокатни келтириб чиқариши мумкин.

Сир эмаски, куз-қиш мавсумида ёнғинлар сонининг ортиши кузатилади. Бунга эса, кўп­лаб фуқароларимизнинг хонадонлар ва иш жойларини иситишда газ ва электр ускуналаридан нотўғри фойдаланганликлари сабаб бўлмоқда. Шунингдек, хазон ва шох-шаббаларни ёқиш, пиротехника воситаларини ишлатиш кабилар ҳам ёнғинларни келтириб чиқариши мумкин.

Жорий йилнинг 5 сентябрь куни кечки пайт Олмазор тумани, Янги Олмазор кўчасида жойлашган «Машҳур Голдин Пласт» МЧЖга қарашли парда безаклари ишлаб чиқариш цехида ёнғин келиб чиққан. Ёнғин натижасида цехнинг ички ва том қисми 150 кв.м майдони ёнган. Ёнғин-қутқарув жанговар бўлинмалари вақтида етиб бориб, кўрилган тезкор чоралар натижасида ёнғин тўлиқ бартараф этилган ҳамда цехнинг 800 кв.м майдони сақлаб қолинган.

Биз, ёнғин хавфсизлиги ходимлари барча фуқароларни оловдан унумли ва жуда эҳтиёткорлик билан фойдаланишга чақирамиз. Уйдан чиқиб кетаётганингизда электр ва газ ускуналарини ўчиришни унутманг. Айниқса, болаларингизни ёлғиз қолдирманг. Сизнинг келажагингиз бўлмиш азиз фарзандларингиз ўт балоси туфайли бир умрга ногирон бўлиб қолишларига ёки умри зомин бўлишига йўл қўйманг.

Тоҳир НОРМАТОВ,

ЎзМТРК ЁХТТЭБ ва ПБ мутахассиси, сержант