Андижон шаҳридаги Ёшлар марказида вилоят ҳокими Шуҳратбeк Абдураҳмонов олий ўқув юртларида таҳсил олаётган талаба-ёшлар билан учрашди, дея хабар берди ЎзА.

Учрашувда вилоят ҳокими бугунги глобаллашув даврида мамлакатимизда ёшлар тарбия­си, уларнинг таълим олиши ва кeлажаги, жамиятда муносиб ўрин эгаллаши учун зарур барча ишлар қилинаётгани, ёшларимиз ана шу эътиборга муносиб бўлиши кераклигини таъкидлади. Шунингдек, ёшлар онгида мамлакатимиз келажаги, амалга оширилаётган ислоҳотларга дахл­дорлик ҳиссини уйғотиш каби муҳим масалалар ҳақида гапирди.
Ёшлар тенгдошларининг ижтимоий-сиёсий фаоллигини, интеллектуал салоҳиятини ошириш, жамият тараққиётига хизмат қилувчи ғоя ва ташаббуслари билан юрт равнақига муносиб хизмат қилиш зарурлиги хусусида таклиф ва мулоҳазалар билдирди.
– Вилоят ҳокими менинг ижтимоий тармоқда «Мен Андижонни севаман» шиори остида хештек очиш, вилоятимиз ҳақида ўзбек, рус ва инглиз тилларида маълумотлар билан тўлдириш ҳақидаги таклифимни қўллаб-қувватлади, – деди Андижон давлат университети талабаси Олимбек Турсунов. – Бу шубҳасиз, нафақат юртимиздаги, балки дунё бўйича интернетдан фойдаланувчиларга Андижон ҳақида кенг маълумотлар олиш имконини беради.
Учрашувда ёшларнинг «Ҳоким ва ёшлар» тадбирини мунтазам ўтказишни йўлга қўйиш ҳақидаги таклифи маъқулланди. Вилоят ҳокими доимий равишда ҳар ойнинг учинчи шанбасида ёшлар билан мулоқот ўтказиб боришини айтди.