Тошкент вилояти Зангиота тумани аҳолиси давлат хизматларидан фойдаланишда ҳеч қандай муаммоларга учрамайдиган бўлишди. Туманда давлат хизматлари марказининг янги маъмурий биноси фойдаланишга топширилди.

Минг метр квадратдан ошиқ майдонда жойлаш­ган икки қаватли янги бинонинг такрорланмас дизайни узоқдан кўзга ташланади. Замонавий компьютер жиҳозлари, хизматларни онлайн тарзда олиш имконини берадиган инфокиосклар, электрон навбат талонини олиш, қайси ойнага мурожаат қилиш кераклигини тушунтиришга ҳамиша тайёр маслаҳатчилар, замонавий ресепшн, болалар майдончаси, кутиш жойлари – ҳаммаси аҳолига қулай тарзда хизмат кўрсатиш учун муҳайё.

Бир неча сонияларда навбат рўйхатини намойиш этадиган мониторларда сизни қайси қабул ойнасида кутишаётганидан хабардор бўласиз. 24 та қабул  ойнасида хизмат олувчиларга 100 турдан ортиқ давлат хизматлари кўрсатилиши йўлга қўйилган.

— Зангиота туманида 200 мингга яқин аҳоли истиқомат қилади, — дейди туман давлат хизматлари маркази директори Акбар Дадабоев. — Ҳозирда хизматлар сони 61 минг 300 тага етди. Шу ўринда, марказимизда давлат хизматларидан фойдаланувчилар сони тобора ортиб бораётганини ҳам алоҳида таъкидлаш лозим. Бир кунда ўртача 350-400 киши давлат хизматларидан фойдаланяпти. Янги бинода хизмат кўрсатиш имконияти ва кўлами янада кенгаяди. Шунингдек, бинода тадбиркорлар учун Бош вазир қабулхонаси ҳам иш бошлади.

Давлат хизматлари агентлиги   

Тошкент вилояти бошқармаси матбуот хизмати