Жиззах шаҳри ва 65 та қишлоқ­даги 1850,4 километрли ичимлик сув тармоқларининг 1182,9 километри ёки бошқача айтганда, 64 фоизи реконструкцияга муҳтож.

Президент қарори билан ҳозир 2018-2020 йилларга мўлжалланган 470 миллиард сўмлик «Зараф­шон дарёси сувидан фойдаланиш ҳисобига вилоят аҳолисини ичимлик суви билан таъминлаш тизимини яхшилаш» лойиҳаси амалга оширилаётир, дея хабар берди ЎзА.
Ўтган йили сув олиш иншооти, сув тозалаш станцияси, сув олиш иншоотидан сув тозалаш иншоотигача бўлган 16 километрли сув қувурлари ва тозалаш иншоотидан 20 километрли магистрал сув қувури қурилди. Иншоотда 78 миллиард сўмлик қурилиш-монтаж ишлари бажарилди.
– Ҳозир умумий узунлиги 183 километр бўлган сув тармоғи, сув кўтариш ва тозалаш иншооти, 100 минг метр куб сиғимли сув сақлаш иншооти қурилиши тез суръатларда амалга оширилаётир, – дейди «Сув таъминоти ва оқова сув объектлари қурилиши бўйича инжиниринг компанияси» давлат унитар корхонаси Жиззах вилояти ҳудудий бошқармаси бошлиғи Мираҳмад Қоратоев.
Лойиҳанинг амалга оширилиши билан Бахмал, Ғаллаорол, Шароф Рашидов, Пахтакор, Дўстлик, Мирзачўл туманлари ҳамда Жиззах шаҳрида яшовчи 860 минг нафардан зиёд аҳолининг ичимлик сув таъминоти яхшиланиши кўзда тутилган.