Мамлакатимизда жорий йилнинг ўтган даври давомида 13 минг 493 та ажрашиш ёқасига келиб қолган оилалар тикланди. Бу ҳақда «Оила» илмий-амалий тадқиқот маркази маълум қилди.

Марказ томонидан олиб борилган тадқиқотлар натижасида ишлаб чиқилган методика, чора-тадбирлар ва тавсиялар асосида ажрашиш учун ариза берган 878 та оила яраштирилишига эришилди. 21 минг 293 нафар бола ярим етим бўлишдан сақлаб қолинди. Шунингдек, оилаларга ёрдам кўрсатиш бўйича «Йўл хариталари» ишлаб чиқилиши 2 минг 670 оиланинг муаммоларини ҳал этди.

Марказнинг «Бўлғуси келин-куёвлар инновацион мактаби»да бўлғуси келин-куёвлар учун оилавий муносабатларнинг маънавий-ахлоқий асослари, оила иқтисодиёти, оиладаги ижтимоий муҳит, никоҳ муносабатлари, соғлом турмуш тарзи мулоқот маданияти ва низоларнинг олдини олиш каби масалалар юзасидан маҳорат дарслари ўтилмоқда. Мазкур мактабларда шу кунга қадар 12 минг 564 нафар бўлғуси келин-куёв таълим олган.