– Ишхонамизда ойлик маош ҳар ой бир хил муддатда берилмайди. Баъзида кейинги ойда ўтган ойнинг иш ҳақини оламиз. Аслида қонунчиликда иш ҳақи тўлаш муддатлари қандай белгиланган?

Т.Ботиралиев,

​​​​​​​Тошкент шаҳри

– Ўзбекистон Республикаси Меҳнат кодексининг 161-моддасига кўра, меҳнатга ҳақ тўлаш муддатлари жамоа шарт­номаси ёки бошқа локал норматив ҳужжатда белгиланади ва ҳар ярим ойда бир мартадан кам бўлиши мумкин эмас. Ходимларнинг айрим тоифалари учун алоҳида ҳолларда Ўзбекистон Республикаси Ҳукумати томонидан иш ҳақи тўлашнинг бошқа муддатлари белгилаб қўйилиши мумкин.

Бундан ташқари, мазкур модданинг иккинчи хатбошида ҳақ тўланадиган кун дам олиш куни ёки байрам кунига тўғри келиб қолса, меҳнат ҳақи шу кун арафасида тўланиши белгиланган.

Шайхонтоҳур тумани адлия бўлими томонидан фуқароларнинг мурожаатларини кўриб чиқиш, жумладан, уларнинг меҳнатга ҳақ тўлашга доир бузилган ҳуқуқларини тиклаш масалаларида доимий иш олиб борилмоқда.

Жумладан, фуқаролар С.Аглаев, М.Азизов, М.Ахмедовларнинг 2019 йил апрель ва май ойлари учун ўз вақтида берилмаётган аванс ва ойлик маошларини олишда амалий ёрдам сўраб қилган мурожаатлари бўлим томонидан ўрганиб чиқилди. Меҳнат кодекси талаблари бузилишига йўл қўймаслик мақсадида бўлим томонидан кўрилган чоралар натижасида Шайхонтоҳур туман ҳокимлиги томонидан ушбу фуқароларга тўланмаган апрель ва май ойлари ойлик маошлари (бир киши учун 1,5-2 млн. сўм) тўлаб берилди.

Фарҳод АКБАРОВ,

Шайхонтоҳур туман адлия бўлими бошлиғи