Одамлар бизга ишониб, эртанги кунга умид билан қараяпти. Бу ишончни ҳар бир раҳбар юрагидан ўтказиб, янгича дунёқараш билан ишлаши, халққа хизмат қилиши керак. Энг муҳим масала — иш жойлари. Ҳамма ҳаракатларимиз аҳолини иш билан таъминлаш, иқтисодиётимизни ривожлантиришга қаратилган.

Шавкат МИРЗИЁЕВ

Ўзбекистон Республикаси Президенти Шавкат Мирзиёев жойларда амалга оширилаётган бунёдкорлик ишлари, ҳудудларни ижтимоий-иқтисодий ривожлантиришга қаратилган йирик лойиҳалар билан танишиш, халқ билан мулоқот қилиш мақсадида 12 март куни Навоий вилоятига ташриф буюрди.

Нурота туманидаги «Мармаробод» давлат унитар корхонасида 10 миллиард сўм эвазига 6 гектар дашт ерда замонавий корхона ишга туширилди. Йилига 24 минг квадрат метр гранит тошни қайта ишлаш имконияти яратилди. Лойиҳанинг иккинчи босқичида йилига 3 миллион квадрат метрга етказиш, маҳсулот турини кўпайтириш ва экспортга йўналтириш кўзда тутилган. Бунинг натижасида йиллик ишлаб чиқариш ҳажми 250 миллиард сўм, экспорт ҳажми 10 миллион долларга етади, бир ярим мингга яқин иш ўрни яратилади.
«Навоий» эркин иқтисодий зонасида «National stone» Ўзбекистон — Канада қўшма корхонаси ишга тушади. Бу заводда тош кукунини зичлаш орқали турли ранг ва ўлчамдаги плиталар ишлаб чиқарилади. 60 киши иш билан таъминланади.
Нурота туманидаги «Чашма» зиёратгоҳи ўзгача чирой очди. 50 ўринли «Нурота» меҳмонхонаси фойдаланишга топширилди. Энди «Чилустун» ва «Панжвақта» масжидлари, Абул Ҳасан Нурий мақбараси реконструкция қилинади.
Президент Навоий вилоятини экспортга йўналтирилган инновацион ва юқори технологияли ишлаб чиқаришлар бўйича эркин иқтисодий зонага айлантиришни таклиф этди.