SOLA бренди остида янги телекоммуникацион Wi-Fi оператори тақдимот маросими бўлиб ўтди.

Мазкур оператор Asia Wireless Group компанияси томонидан тақдим этилган. Тармоқ айни вақтда бепул тарифдан ташқари пулли тарифларни ҳам таклиф қилмоқда. Бепул Wi-Fi тарқатилганда фойдаланувчи аввалига оператор томонидан тақдим этилган рекламани кўриши керак бўлади. Рекламалардан холи тармоқни эса пулли хизмат орқали сотиб олиш мумкин.

Компания директори Беҳзод Аҳмедовнинг таъкидлашича, SOLA тармоғи айни вақтга қадар Тошкент шаҳрининг Жанубий ва Шимолий вокзали, «Samarqand Darvoza», «Mega Planet» «Parus», «Vega Centre» каби кўнгилочар савдо марказлари, «Чилонзор», «Қатортол», «Юнусобод» ва «Паркент» бозорларида ишламоқда. Келгусида бу каби ҳудудлар янада кенгайтирилиши кутилмоқда.

Компания Ўзбекистонинг сайёҳлик оқими юқори бўлган шаҳарларида бепул Wi-Fi тармоқларини жорий этмоқчи.