Ўзбекистон Ички ишлар вазирлигининг Ёнғин хавфсизлиги институти ташкил топганига 25 йил тўлди. Шу муносабат билан институт фаолиятига бағишланган «25 йил: шараф, маҳорат ва мардлик мактаби» номли китоби тайёрланди. Миллий матбуот марказида мазкур китоб тақдимоти бўлиб ўтди.

Ғафур Ғулом номидаги нашриёт-матбаа ижодий уйида чоп этилган мазкур китоб-альбом кенг омма учун мўлжалланган бўлиб, унда таълим даргоҳининг чорак асрлик тарихи батафсил акс этган. Хусусан, институтнинг ривожланиш босқичлари, кафедралари фаолияти, кадрлар тайёрлаш тизимининг шаклланиши, ўқув-тарбия жараёни ёшлар маънавиятини юксалтириш ҳамда спорт соҳасида эришилган ютуқлар ҳақида сўз боради.

Бундан ташқари, институт ривожига муносиб ҳисса қўшган раҳбарлар ва профессор-ўқитувчилар, уларнинг илмий-тадқиқот йўналишда эришган муҳим натижалари, тадбирлар ва халқаро ҳамкорлик тўғрисида атрофлича маълумотлар берилган.

Китоб таниқли шоирларнинг оловга кирувчи шерюрак йигитлар жасорати мардлиги ва қаҳрамонона ҳаёти ҳақида битган шеърлари билан бойитилган.