Оролбўйи болалари учун таркибида реабилитация маркази бўлган 120 ўринли ихтисослашган мактабгача таълим муассасаси ташкил этилади. Бу ҳақда gazeta.uz хабар тарқатди.

Муассаса имконияти чекланган болаларга таълим бериш ҳамда уларни жисмоний ва интеллектуал имкониятларидан келиб чиқиб тарбиялаш ва реабилитация қилиш учун синов лойиҳаси шаклида ташкил этилмоқда.

30 июнь ҳолатига кўра, Мактабгача таълим вазирлиги тизимида алоҳида парваришга муҳтож болалар учун 188 та ихтисослашган МТМ фаолият кўрсатмоқда. Мазкур муассасалар 21 минг бола ёки уларнинг 3,3 фоизини қамраб олган.

Янги муассаса ихтисослашган кўп профилли МТМ ва реабилитация марказидан таркиб топиб, унга тарбияланувчилар ҳафтасига беш кун тўққиз соатдан қабул қилинади. МТМга тиббий-психологик-педагогик комиссия хулосаси асосида 2-7 ёшли болалар қабул қилинади.