Риштон туманида «Ёшлар — келажагимиз» Давлат дастурини амалга ошириш мақсадида ташкил этилган саккизта ишчи гуруҳ тумандаги 66 та маҳалла фуқаролар йиғинида 16 минг 700 нафар ёш билан мулоқот олиб борди.

«Ҳар бир фермерга бир ёш» лойиҳаси бўйича 323 нафар ташаббускор ёш аниқланиб, уларга 165,5 гектар ер пудрат шартномаси асосида берилди. 13 нафар ёшнинг имтиёзли кредити айнан ўрганишлар жараёнида ижобий ҳал этилишига эришилган бўлса, 15 кун ичида 645 нафар ишсиз ёшларнинг бандлиги таъминланди.

Кредит олиш истагида бўлган йигит-қизлар таклифига кўра, «Ёш тадбиркорлар кўчаси» ташкил қилишга келишилди. Қўқон-Фарғона йўлининг туман ҳудудидаги «Зарариқ» МФЙ дан бошланиб, Бағдод туманининг «Конизар» МФЙ гача бўлган 7 километрдан ортиқ жой қамраб олинади. Айни пайтда мазкур кўчада «Ёш тадбиркор» коворкинг маркази ва «Ёшлар меҳнат гузари» қурилиш ишлари давом этяпти. Ҳозир мазкур кўчада юзга яқин ёшлар тадбиркорлик қилаётган бўлса, келажакда уларнинг сони 500 нафардан ошиши кутиляпти.

Нодиржон ЮСУПОВ