Самарқанд вилояти ҳудудидан ўтувчи автомобиль йўлларида ўрнатилган махсус автоматлаштирилган фото ва видео қайд қилувчи фоторадарлар тўлиқ ишга туширилди. Бу ҳақда вилоят ИИБ ЙҲХБ ахборот хизмати хабар қилмоқда.

Махсус автоматлаштирилган фото ва видео қайд қилувчи радарлар белгиланган тезликдан юқори ҳаракатланган автоуловлар тезлигини қайд этади. Шу вақтнинг ўзида йўл ҳаракати қоидалари бузилгани бўйича жарима солиш тўғрисида маъмурий ҳуқуқбузарлик содир этган шахснинг иштирокисиз транспорт воситасининг эгасига нисбатан қонунчиликда белгиланган тартибда қарорлар чиқарилади ва фото тасвир илова қилинган ҳолда яшаш манзилига юборилади.

Бундан кўзланган мақсад, вилоят худудида оғир оқибатли йўл транспорт ҳодисаларининг олдини олиш, уларнинг сонини камайтириш, ҳайдовчиларнинг ҳушёрлигини ошириш ва йўл ҳаракати иштирокчиларининг ҳаракатланиш хавфсизлигини таъминлаш ҳамда инновацион технологияларни ҳаётга татбиқ этишдан иборатдир.