«Биз эру хотин 4 фарзандимиз билан ижарада яшар эдик. Бугун ҳаётимдаги энг қувончли кунлардан бири. Боиси, ҳам уйли, ҳам ишли бўлдим, тикув машинаси ҳам беришди-да...»

Янги уй соҳибаларидан бири — II гуруҳ ногирони Муҳайё Ҳусанова хурсандчилигининг чеки йўқ. Сирдарё вилояти Мирзаобод туманидаги кам таъминланган, уй-жойга муҳтож 10 оилага мана шундай қувонч кириб борди. Уларга янги уйлар калити топширилди.

Мирзаобод туманидаги «Боғистон» маҳалла фуқаролар йиғини ҳудудида янгиланган лойиҳа асосида қурилган 10 та замонавий уй «Жавоҳир Фарҳод ҳамкор сервис» хусусий корхонаси қурувчилари томонидан бунёд этилди. Уйларда индивидуал иситиш тизими, иссиқ ва совуқ сув, табиий газ ва электр таъминоти барча техник талабларга кўра жиҳозланган.

Хонадонларда барча қулайликлар яратилган. 2 сотих ер майдони, 2 яшаш хонаси, ювиниш хонаси, ички ва ташқи ошхона замон талабларига тўла жавоб беради. Айниқса, тандир-ўчоқ ҳам борлиги уй бекаларини ғоят хурсанд қилди.