Тиббиётимиз тарихида илк бор жигар трансплантацияси амалиёти ўтказилган бемор — паркентлик 26 ёшли Убайдулла Дадахўжаев шифо топиб уйига қайтди.

15 соат давом этган операция академик ­В.Воҳидов номидаги Республика ихтисослаштирилган хирургия илмий-амалий тиббиёт марказида муваффақиятли амалга оширилди. Беморга 30 ёшли акаси Ҳаёт Дадахўжаев донорлик қилди.

Мутахассисларнинг таъкидлашича, жигарнинг терминал босқичдаги сурункали диффуз касалликлари, ўткир жигар етишмовчилиги каби ҳолатларда фақатгина шу аъзо трансплантацияси бемор ҳаётини сақлаб қолиши мумкин. Бундай юқори технологик операциялар Америка, Россия, Германия, Норвегия, Швейцария ва Ҳиндистон каби тиббиёти ривожланган давлатлардагина бажарилади, холос. 

Соғлиқни сақлаш вазирлиги ахборот хизмати хабар беришича, ҳозир беморнинг ҳам, донорнинг ҳам аҳволи яхши.