Ҳозир пойтахтимиз бўйлаб қатнайдиган автобусларнинг кўпига телевизор ўрнатилган. Манзилга етгунча истасак-истамасак, кўзимиз экранга тушади. Хўш, унда нималар намойиш этилмоқда?

Автобус жамоат транспорти. Унга ёш ҳам, қари ҳам, болалар ҳам чиқади. Телевизорда  намойиш этилаётган лавҳалар беихтиёр йўловчилар эътиборини тортади. Бироқ очиқ-сочиқ, беҳаё клипларни қўйиш... Ачинарлиси, улар орасида ўзбек хонандаларининг менталитетимизга тўғри келмайдиган хатти-ҳаракатлари акс этган лавҳалар ҳам бор. Йўловчиларнинг аксарияти мактаб, коллеж ўқувчилари киприк қоқмай, уларни томоша қилади. Ёши каттароқлардан тортиниб ҳам ўтирмай, баланд овозда муҳокама ҳам қилишади.

Бирорта ёши каттароқ йўловчи ҳайдовчи ёки чиптачига телевизорда кетаётган лавҳалар ҳақида эътироз билдирганини кўрмадим. Аслида бугун давлат сиёсати даражасига кўтарилган, вояга етмаганлар ва ёшлар ўртасида жиноятчиликнинг секин-аста куртак ёйишида ана шундай беҳаё клиплар, тажовузкорлик акс этган лавҳалар ҳам сабаб бўлмаяптими?

Тўғри, бугун реклама замони. Иқтисодиётнинг ривожланиши учун реклама зарур. Бироқ экранларда айни кунда долзарблик касб этган китобхонлик маданиятига ҳисса қўшадиган роликлар намойиш этиш фойдалироқ эмасмикан? Чунки жамоатчилик тўпланган, уюшган жойда доим турли қараш юзага келади. Ана шу қарашларни эзгуликка хизмат қилувчи ғоялар сари етаклаш керак, назаримда...

Озода ВАЛИЕВА