Ўзбекистон кўҳна замин. Мард ва жасур йигитлари сиймосида ­Алпомишу Жалолиддин Мангубердиларни кўргандек бўласиз. Полвон десангиз, полвонлиги, ботир десангиз, ботирлиги бор. Бу халқнинг мардлиги-ю тантилигини дунё билади. Айниқса, ўзбек полвони гиламга тушганда беихтиёр ларзага тушасиз, қонингиз жўшиб кетади...

Асрлар давомида ўзбек халқининг миллий спорт тури бўлган кураш ҳамон ўз оҳорини йўқотмай сақланиб келмоқда. Негаки, йигитларнинг жисмонан кучли, иродали бўлишида, тўю сайилларга завқ-шавқ бағишлашида унинг аҳамияти беқиёс.

Марказий Осиё кураш федерацияси ташаббуси билан Миллий матбуот марказида ўтказилган анжуманда курашнинг дунё миқёсидаги нуфузи ва Марказий Осиё кураш федерациясида олиб борилаётган ишлар, истиқболдаги вазифалар ҳақида гап борди. Унда Қозоғистон, Қирғизистон, Россия давлатларидан келган вакиллар, кураш фидойилари иштирок этди.

— Ўзбек кураши нуфузини ошириш доимий эътиборда, — дейди Марказий Осиё кураш федерацияси раиси ­Холмурод МУБОРАКОВ. — Шу мақсадда 2015 йилнинг 5 сентябрида Марказий Осиё давлатлари кураш федерацияси вакилларининг 1-таъсис конгрессида Марказий Осиё кураш федерациясига асос солинди. Ўзбекистон, Туркманистон, Қирғизистон, Тожикистон, Қозоғистон давлатларидаги кураш федерациялари унга аъзо бўлишди. Федерация халқаро миқёсда фаолият юритиб, курашни ривожлантириш мақсадида Марказий Осиё минтақасида мусобақалар, ўқув-машғулот йиғинлари ва бошқа тадбирларни ташкиллаштиради. Келгуси йил Бухоро шаҳрида нуфузли халқаро мусобақа ўтказилади.

— Ўзбекистон билан азалдан ён қўшни, қон-қариндош бўлиб, аҳил-иноқ яшаб келамиз, — дейди Қозоғистон кураш федерацияси раиси Бахт ­ЯНГИБОЕВ. — Бу иноқлик айниқса, ўтказилаётган кураш мусобақаларида яққол сезилади. Бугунги кунда Қозоғистонда ўзбек кураши кун сайин оммалашмоқда. Масалан, яқинда ўтказилган беллашувда жаҳоннинг ўн икки давлатидан келган манаман деган полвонлар қатнашди. Аслида спорт қондош-қариндош халқларни янада жипислаштиради.

Улуғбек ЖУМАЕВ,

«Оила даврасида» мухбири