Пойтахтимиздаги «PROlogue» – ёш киноижодкорлар суратга олган қисқа метражли фильмлар III фестивали доирасида «Ёшлар ва кинематография» мавзуида илмий-амалий конференция бўлиб ўтди.

Конференцияда кинонинг ёшлар тарбиясидаги ўрни, ўзбек мультипликация санъатида янги ижодий жараёнлар, кинода тасвирий ечим, бадиий асарлар экранизацияси, миллий кинематография ривожида театрнинг ўрни, кино ва эстетик дид, фильм яратишда кинооператор маҳорати каби мавзуларда маърузалар муҳокама этилди, дея хабар бермоқда ЎзА.

— Ёш киноижодкорларнинг фестивалга тақдим этган ишларини кузатар экансиз, улар кўпроқ адабий ва бадиий асарлар ўқиши зарурлиги кўзга ташланиб қолмоқда, — дейди Ўзбекистон Давлат санъат ва маданият институти профессори Абдураҳим Исмоилов. — Кинолойиҳалардаги воқеликни, унинг мазмунига сингдирилган ғояни томошабинга ифодалаб бериш киночидан чуқур билим ва маҳоратни талаб этади. Булар эса бевосита мутолаа билан боғлиқдир.