Мустақиллигимизнинг 26 йиллик байрами ҳамда Қурбон ҳайити муносабати билан Тошкент шаҳар ва туман ҳокимликлари ҳамкорлигида «Ҳеч ким меҳр-эътибордан четда қолмасин» номли маданий-маърифий тадбир ўтказилди.

Тадбирда боқувчисини йўқотган ҳамда ижтимоий ҳимояга муҳтож 500 нафар фуқарога байрам дастурхони ёзилди. 36 нафар ногирон ва ижтимоий ҳимояга муҳтож инсонларга имтиёзли асосда уй берилди. Меҳрибонлик уйининг 4 нафар тарбияланувчиси ҳам янги ва замонавий уйга эга бўлди.

— Бу фуқароларимиз учун ҳам моддий, ҳам маънавий кўмак бўлди, — дейди Яккасарой тумани Абдулла Қаҳҳор номидаги маҳалла фуқаролар йиғини раиси Феруза Орипова. — Айниқса, маҳалламизда истиқомат қилувчи иккинчи гуруҳ ногирони Зуҳриддин Шоназаровга давлатимиз томонидан имтиёзли асосда уй берилгани унинг оиласи учун байрам туҳфасига айланди. Хушхабар нафақат Шоназаровлар оиласи, балки бутун маҳалла аҳлини қувонтирди.

Янги уй соҳиби Зуҳриддин Шоназаров акалари билан тўрт оила бирга 3,5 сотихли ҳовлида яшарди. Янги уй-жой масаласини ўйлаб боши қотганди. Ёлғиз ўғли бор, «тўй қилиб келин олсам нима бўлади», деган савол қийнарди уни. Шундай ўй-хаёллар билан юрган кунларининг бирида маҳалла раиси унга хушхабарни етказди: «Табриклайман, янги уйли бўлдингиз!». 

Шу лаҳзаларда Зуҳриддин аканинг қувончи ичига сиғмай кетди. Кўзларига ёш қалқди. Ахир, уйнинг бошланғич тўлови давлатимиз томонидан амалга оширилган эди.

— Кўп йиллардан бери дилимга тугиб юрган орзуим ушалди, — дейди Зуҳриддин ШОНАЗАРОВ. — Бу ёрдам биз учун қўшалоқ туҳфа бўлди. Мустақиллик байрамини янги уйда нишонлаяпмиз. Президентимиздан чексиз миннатдормиз. Бугун мен қатори яна кўп юртдошимиз бундай ғамхўрликдан баҳраманд бўляпти. Шу туфайли жамиятда ўз ўрнини топмоқда.

Ҳа, бу юртда ҳеч ким меҳр ва эътибордан четда қолмайди. Байрам байрамларга уланиб, халқимизнинг турмуш даражаси, яшаш шароити яхшиланиб бораверади.

Ноилахон АҲАДОВА,

«Оила даврасида» мухбири