Хабарингиз бор, Германияда бокс бўйича жаҳон чемпионати бўлиб ўтди. Турнирда иштирок этган боксчиларимиз 1 та олтин, 3 та кумуш ва 2 та бронза медални қўлга киритишди. Мусобақада Шаҳрам Ғиёсов олтин, Ҳасанбой Дўсматов, Жасурбек Латипов ва Иқболжон Холдоровлар кумуш, Бектемир Мелиқўзиев ҳамда Санжар Турсуновлар бронза медаль билан тақдирланди.

Рио Олимпиадаси совриндори, ҳам­юртимиз Шаҳрам Ғиёсов ҳал қилувчи жангда кубалик Рониэль Иглесиасга қарши рингга кўтарилди. У жангни кўтаринки руҳда ўтказди ва якунда 5:0 ҳисобида ғалаба қозониб, жаҳон чемпиони, деган номга сазовор бўлди.

Шаҳрамнинг ушбу ютуғи, шубҳасиз, мамлакатимиз довруғини яна бир бор бутун дунёга таратди. Жаҳон чемпионатида нафақат Ғиёсовни, балки бошқа боксчиларимизнинг ҳам қизғин иштироки, халқаро майдонларда муносиб қатнаша оладиган иқтидорли спортчилар авлоди вояга етаётганини кўрсатиб қўйди.

Мусобақа якуни бўйича Куба терма жамоаси умумжамоа ҳисобида биринчи ўринни (5 та олтин, 2 та кумуш) эгаллади. Ўзбекистон термаси иккинчи ўринни банд этди. Кучли учликка Қозоғистон боксчилари (1 та олтин, 2 та кумуш ва 3 та бронза) якун ясади. Шунингдек, Украина, Франция ва Озарбайжон терма жамоалари ҳам ўз ватанига биттадан олтин медаль билан қайтишди.